EZEKIEL 36:26
Lungchang thak hun pia’ng ka tin, la sung ah thagau thak hun koi ta’ng ka; nangma taksa ah kipat suang gual ah tâk lungchang chu ladok ing ka tin, phe gual ah nêm lungchang hun piang ka
Thagau lam hukdamna ding ahin mihiamten’ bawl thei bangma ki neilo ahi. Hukdamna(Pianthakna) ding a leisiat mihiam ten i bawl thei(contribution) um sun chu i gitlonau hi ahi Hukdamna thil thawn
piak leh hukdamna nasep chu bangkim Pathian a ahin, Pathian apat liau liau ahi. Ama hepina ziak bep a ginna chun zia Pathian apat thilthawn piak hukdamna chu i chang(i nei/received) thei ham ahi.
Thilpha-naseppha ahem, Sakhuana kibawl dante, zektan ziak, Sabbath ni sagini chawl ziak ahiloleh baptisma chang ziak a hukdmana(salvation) kinei thei ahi puai. Hukdamna ding a mihiamte bawl ding nasepna poimawi ti gen pawl a um chun khautak a nawl ding ahi.(work-based salvation proponents must Outrightly rejected). Bang ziakin em iti le Bible zilsakna kal ahiziakin!
Jesu Khrista tatsate(redeemed) chu gingtu Khristian kiti te ahiu hi. Zia tatsa techu Pathian ading a Kochuam te chu ahi tau hi. Hukdamna chu dan leh dun leh biakinn vai a kibawl kawm zui ding chi chuam chuam te zui kim ziak a kichang ahi puai. Baptisma chan ziak ahem, Lalpa zan ann(communion/sacrament) nek ziak ahem ahiloleh Biakinn a dan zokim min khumna(register) zik lut ziak ahi puai. Dan leh Hepina khen thiam angai hi. Mawk pawlkhom(mix) lo ding ahi. KHRISTAN’ ei hukdam ziakah Pathian lunglam napha sem dingte chu Khristiante ihiu hi. Thilpha-napha sep ziaka Khristian te ihi puau hi.
Achung a i Bible chang suklat in agen gual in Lungchang thak(new heart) chu Pathian in ei pia na em? Khristian kiti khat chu lungchang thak anei tei ding ahi! Hukdam ihi apat in lungchang thak, ngaituana thak, lunglutna thak, mu nop et ut leh gennop athak, sim ut leh khoi ut athak i nei tei tei ding ahi. Kidak leh i do ding athak le tampi um ding ahi. Gitloma leh sualna thilte hua in, i do zing na em? Khawvel thîltak ah va huat a, do ding tina ahi puai! Ei a sualna gitlo bawlnawp na um zingte Pathian Panpina dawnin I do zing ding ahi zawi.
Taksa thilah utnate(desire of the flesh) banggual takin la do em unau? Do ding neilo, bangkim mawk amen amen ziang hinkhua mang zawk ihiu em? Zia gual chu ihiu chun i hukdamnau etthak ngaiding ahi BIBLE a Jesu apat hukdamna hilo, mani mimal ngaidan leh Sakhua lamah hotute ahem thugentu revival speaker te piak kom leh phasak mai mai a piangthak hikhai tiu aw.
Pianthakna umzia diktak helo leh neilo hinla midang pianthak sak gua thugentu lem tam mama ahi.
Pianthak ma tawh kibang talo athak ei a umte bang bang ahi diam? Lekhabu a zik dawk ding hile hin bang bang ei diam?
I Pianthak hun ahem Pianthak ni kha i limna pen ni ahi khak le vang chu Piangthak khial kihi kha ding ahi. Pianthak til hun apat Thagau lam ann kibang zing ihiu em? Khantona leh piting na bangma nei chuamlo ihiu chun Khristian kiti ve sam hinla hukdamna lungkham um hikha ding ihiu hi. Hukdamna kichian neilo te ziak in Khristian te ginna hi adiakin ginglotute apat damkai mama hi.
Pathian in thinlung thak ei pia tai ti a tangkopi ngam ihi na em? Thinlung thak nei tak tak ihi chun im zaw ding gual hilo ahi. I hinkhua mat dan, nek leh dâwn dante leh bangkim a i khawsak danin thinlung thak piak ihi na em, thinlung thak nei ihi na em tichu het thei mai ding ahi. I thanop nate, nuam isakte leh i limna te kha Pathian lunglam leh ama lopina ding ahi na em? Ka hun tam zaw ka suk beina apat hin kua hem ka pathian tichu hetthei mai ding ahi awlsam takin! La pathian kua ahi em Unau? La thawnop pen leh la lunggil takah la ngaikhawk pen bang(kua) ahi em unau?
Tuni hin kingaitua vek hitiu, zia hi thu ngainawp um vang ei puai hinla thutak i hiat poimawu’ ahi. Upat tak ziak ahem, kochuamten zui ding ah dan a siam komteu i zui ziak ahem, thawlom i tuak phat ziak ahem, sawmakhat i piak ziak ahem in KHRISTIAN(HUKDAM) ki hilo ahi.
Pianthakna chu Pathian thumatna in aki chian mai ahi. Pathian ginna dik tak chu Pathian Thumatna in azui ding ahi. PIANTHAK ziakin Thilpha bawl ding ihiu ahi.Hinla Thilpha bawlziak in pianthakna kichang ahi puai ti hechian hitiu aw. Thugen thiamte, revival speaker te, testimony gen ziak ate, camp lut ziak ate, altar call a va din daw chuam ziak te in Pianthakna kinei ahi puai. Piangthakna chu Pa Pathian nasep ahin,Thilmak leh lamdang(mystery)ahi. Hui(wind) aki mutheilo vangin a nungna lam hiat thei ahi. Ziagual bawk chun Piangthak hinkhua umzia chu ama hinkhua leh Thagau ga apat in haksa lo hial in hiat thei ahi mai hi. Ei ziakin miten Pathian thu lunglutna leh thanopna anei diam uh? Ei ziak zawk in miten Mission workers te ahem ahiloleh Kochuam thilte muan zawlona leh thulaklona anei zaw diam uh tihi dawtna poimaw tak ahi.
Kochuam loiupate, innsung nu leh pate leh pulpit lua munte apat hin Pathian in vaihawmna khautak ei nei khum masa ding ahi ti geeldawk thak hitiu aw.
Nang leh kei ei hechian Pathian hi i neilo ziak leh i hetchianlo ziak ua hin Khristian hina leh Khristian ginna hile ei mau phasak dan in i chiapi gam tau ahi! Pathian hi hepina dim bep ahipuan Pathian hi a thiangtho gitlo(khelna) tawh umtheilo, a lungna thei ahi. A lungnatna[wrath] lauthawng umtak tawh mihiamte vaihom khum in gawt ding ahi!
Zia Thinlung thak chu piak ihi nailo chun hukdam hi nailo,mi piangthaklo Khristian lem hiding ihiu hi. I dinmun sia mama ta siamphatna(remedy) um sun chu mi gilo, sual hi kisik a, Lalpa Jesu, bel ding chu ahi. Kisik a Pathian lam pat hun hi kikhel thei ahia, thinung leh gawtmun a kisikna in bangma phachuam talo ding ahi ngal a. Pathian i bel nawplo hun, Pathian i limsaklo hun hi ei a ding a hun poimaw laitak hiding ahi. Dan phat tak leh bel nuam tun tun in ki ko ko leng le bel theilo hun hung tung phut thei zing ahi. Pathian apat HUKDAMNA- PIANTHAKNA la nei tak tak na em? Nang Thagaulam dinmun kuaman hung hetpilo ding ahi aw. Khawvel et leh a mawi mai mai, a kilom mai mai in lungmuang mai puai tiu aw. Mite mu a kilomna hi haisan hitiu.Ei leh ei kithem puai tiu aw. Pa Pathian lam en zaw hitiu. AMAN ei hechian in ei muchian taluai.
CHUNGLAM APAT THIL THAWN PIAK LUNGCHANG THAK I NEINA DING IN, ITLO A PIA PA PATHIAN KIANG IN DAWN HITIU AW
Bible Pathian Thu sim ding te;
John 3:8
1 Peter 1:3
John 13:35
John 1:12-13
Isaiah 43:7
1 Samu 16:7
Psalm 51
1 Samu 15:22
Gal 1:10
Isaiah 26:21
Psalm 71:11
1 1John 1:9
Acts 2:38
2 Corth 6:2
