DO LEH GAAL AH KI ETNA KHAWVEL BANG HUNG SUAK DING ?
Changtel: Pawtdawna 14: 14. Mathai 24: 6., Thupilte 21: 31.
Aziktu: Pu. Ginlalthuam
“LALGIN INN”
Mualngat Innpi.
Khualzinna gam
Land of pilgrimage
Khawvel ah mihingte hih Pathian in kihothei leh kihepi tuah takah khawsa khawm ding ah ei lah siam kihinapi’n mihingte hindan kibat lo ziak khat ahitah diam ! Lungput, mel leh puam, hindan, khawheidan, dudan, dawidan kibang kih umlo; a khen khat chuh mi pawikhawi ding bepchah gel, mi tawhle kicham nuamlo him him, gitlo a bawllo ahileh ipmutna maimit sing ngailo tibang hih mihingte hindan chuh ahi ta ahi. Lunggel phah gelle kih um theitalo, gaal leh tual ah kido ding bepchah ngaituah in hinkhua i mang mai tau ahi.
Ziahziak achun India tawh a kigam gitpi te Pakistan, Bangladesh, Srilanka, Nepal, Bhutan, Myanmar leh China tawh khantouna ding ngaituah in khatvei vei kihotuana leh ki nawptuana suai (signature) bang ala kaikhawm sek maleu Pakistan tawh chuh tuni chan in kihotuana um ngaih lohim him ahi. A ziakchuh Pakistan te hin India tawh kihotua ding dawite chuh Prime Minister in atel ngaihlou him him uh ahiu. Kum 1947 apat tuni chan in JAMMU & KASHMIR ah gaalguk bawl (Thingnuaimi) a beithei ngailo ahi.
India te hin agam uhi gamdang ah chawntheilo ahi ziak’un…..we have to learn how to love with Pakistan tilou means dang umlou phawt ahi. Sapten….”You can not choose your neighbour” atiu ahi.
Mihiamte hih sualna kidim ahitak ziak’in do leh gaal bep ah ki ettuana ngawn a dim ah kihi tah hilam !
Tulai khawvel chiadan leh mihiamte hindan isui lai in, tu khang hih kilungsiat leh kihepi ah kichamnawpna lunggel gel ki umtaloa bang ziang tai. Gamkhat leh gamkhat kihotua talou in…
DO LEH GAAL AH KI ETNA KHAWVEL AHI TÂK ZIAK’IN:
Khawvel hi bang hung suak ding ahi tam ?
Iran🇮🇷 leh Iraq🇮🇶 bang kum 8 hilhial ala kido; South leh North Veitnam🇻🇳, East leh West Germany🇩🇪, South🇰🇷 leh North Korea🇰🇵, Armenia🇦🇲 leh Azarbaizan gamteni ala kido ua, kido phat chuamlo ziah ahun hiat phat un CEASEFIRE puang in ala tawpsan kik tau ahi. Tulai tak in Russia🇷🇺 tawh Ukriane,🇺🇦 Israel🇮🇱leh Iran🇮🇷/Palestine🇵🇸, Myanmar(Burma)🇲🇲 democracies dawilona ziak in PDF(mipi) tawh government sepai a kido zing ta mai uh ahi chuleh Meitei tawh Kuki Zo United Manipur ah khang tamtak ala cheng khawmtate (I chin, inao ngaktani, apunbage shaktam manghan gumse) ala kitituah zingtute chuh tuhin kikhen tawp maiding ah kihsa hitaleh kilawm, i kido tamai uh ahi.
Ziah i kidonau hung kipatna hih kum 2001 vel ah Pu Narendra Modi, Chief Minister of Gujarat state, apuak lai ah muslim te thachimit ah ala um uh kha, ziahgual lunggel khah thi tahloh in, tuh ah Manipur tual-gaal hile hung hih toupek hih ding in gingchak aum ahi.
Kuki Zo suan (Khristian) te India mi leh sa kihingal ah kapchimit na ding ah government hiam leh thâl lak piak/gûkpiak ah ei kap uhi tuni tiang ah government in kamkhat chah ziang le genkhah nailo in, India danpi zuitalo, hotu vaihawmna hih President’s rule(PR) kawimai ding ah phah hitamaleh kawi hidiak lo in, India dan ila nei uhi khawi ah um ahi tam ? Christiante kingaituah ahun tak zet hitalo maw… ! Central apat relief fund/Scheme chuam chuam, i duchakna hilo in, Manipur thingtanggam chanvouh ding ah hung te hila, atam zawh hungtungpha talo, India mi leh sa ahle ngailo thingtangmi te chuh ihitau em ? Israel tawh Palestine/Iran ahung kido uhleh kisalah ma ma ziang, Manipur a gamsung ah, Kuki Zo suante tawh Meiteite nasa tak ah melma ki entuah ah kido tah, kihiatlo sak tei tei nalai lai hotu, Christian te thachimit guahzing khah kua ahi em ?
Pathian in namkhat chung ah vai ahawm piak nuam phat takle hotu gilo apeh sek ahi.
India gamsung ahin Christian sakhua hote sukgenthei na hih a khawk deu deu ziangtah, do leh gaal ah nawchimit ah suk manthai ding ei kiti ahi tam ? Ziah thu ahin ei Khristian sakhua zuitute hin government tuzinglai tehi dawtna i bawl nuam ngeih ding un ka gingchah ahi.
Khawvel ah hin kido, kigaal nate hi bei ngaitalo ding abang ziang tah ahi. Khawvel hih bang hung suak ding ahi tam ?
Kidopi pathumna (World war 3) hung um phut ziang thei khawvel chuh ah hitah ahi.
Maleh…..
Changtel:
Ch. 14na “Lalpa’n, nang uh ading in gaal hun do piak intin, thipbek bek in um mai un”, a tia.
Hotu Mosi’n, Israel chate Kannan gam azawtpi lai in apuizing, a mipite’n, haksat genthei nate thuak peilo in Aigupta/Egypt ahung nutsia nau gam, nungthil in chuleh ngaihvawng vawng in a phunnawi uh ahi kha….!
Ziahgual ah chun ei Khristian vangam zuan ah I chiat lai uh hin, gaal leh tual ziak ahem ! Ahilole haksat genthei, lungkham beidawn, luhsûnna te I tuak ziak uh ahem in, Lalpa i Pathian chung leh hotute chung in i phun nawilo ding uh ahi.
I Lalpa Jesu Khrista in lungkham lungdawng ah I umlona ding un….
Ch. 6na’n, “Kidona leh kido thuthangte hian lah tiu in; la lungkhamlo na ding un kiveng ta’un; ziah thil zosia chuh ahungtung ding him chuh ahi; himaleh a tawpna chuh hiziang puan’a.
Ziah thuh ahin ei Pathian chah sak ah um Khristiante i kithah muan tuahzing ding uh ahi.
Ch. 31na, Sakawl chuh kidona ni a ding ah kisah zosa ahin; gaal zawna vang…. Lalpa â ahi.
Do leh gaal ah kih etna khawvel ahitak ziak’in mihingte hin Lalpa i Pathian sang in, inei ilam, i thiam leh i chitna te hi suang in taksa chuleh thagau gaal I do’nau ahin kimisak tak in um khah khai tiu, Khristian chingthei tak in i Lalpa Pathian suang zing kawm in i gaal uh hih hattak leh hangsan tak in ama tawh dokhawm zing hitiu e, gaal zawna chuh Lalpa â ahi ngal’in.
Do leh gaal ah ki’etna khawvel hi bang hung kisuak ding ahi tam ?
La Pathian tuak ding in kisazo tan.💫
