KHAMTHEI/ LEH GUIHTHEI ZAWNGSAK NAWPDAN LEH HAKSAT DAN
– K L Muana Khaute
Khamthei zat chuam chuam drugs, zu, nganja, kuva, chep leh muam zat chuam chuam khamtheite hi I bawlpat leh a nuam leh sulim mama gual in a kilang ah, ahin mihiam hinkhua kipakna bukim pethei ding in kinepna ilanei khasek ahi. Ahin matkhialna leh khamthei, guithei thang I hung awk ahichun hinkhua genthei leh kidak um mattaklo in beidawng maleh addict khak tak ziak in hinkhua lulna leh za-umna taisan in neilo sasa’n aman ding hawl in sum muna din sum leh pai ihawl a, sual suak in hinkhua thanghuai leh kidak um, hinman umlo hinkhua a tut ahi. Khenkhat vang vang chu puksia beidawng in guk ding, thep ding hawl in khamthei man ding hawl in, Insung mangthaipi in, dinmun siatak a tun khawlaw uh ahi. Thilpha ahilo dan kichian mama ahi, khenkhat vang vang chu Nu leh Pa lawi leh pai kiang in, mi dinmun gelphalo in I hawl sek ui. Khamthei bawl hi a nuam in a kilang ah, khamthei suak a lutte chu mualpho tak in, hina value umlo in, musit um tak in khutdaw vel vel in tualniam tak in hinkhua mat khawlawna a piang zing ahi. Zia beplo achun Insung leh khawtang buaina siam a mite I subuai bep uh ahi. Zia dinmun tiang I tung phat leh chu haitheilo ihung hi pan tau. Zia hi ki hiat a kisiam phat angai in, khamthei leh guithei hi, kikawikang a hawipen ahi, ki siampha zolote chu addiction tak tak ihita, buaina luiguam leh thina lampi chu zui ihi tangal ah, mipi muda leh lau ihung hita, mani ngei ki ngaisiatna leh lungkhamna’n idim ta ahi.
Zia dinmun chu I tunphat leh lungthim haisan nawpna chu a hung kipan a, mimal kidek zawna, mipi leh thagau mite pauchappina a pawimaw ban in, Pathian thagau thilhitheina lo achun kisum zawna hi thil haksa tak ahitai. Amabo, ama leh a thilsia haisan nuam ten ten te chu nasatak a panla in Thimlalpa vaihawmna chu ki hiatdaw in ama Lalpa thagau panpina tawh pangkhawn in zia saltanna apat chun a kilip thiangtho thei ui ti chu I Bible inle ei ziltilna ahi. Zia tilo achu khamthei sal apat pawt theina ding um ta puan ah, thina overdose or natna phalo in ei tak buak intin thina leh manthaina chu a himai tai. Amabo, siamtu gingcha ama panpi dawnte chu Lalpa chawl damna leh damna chu a piathei hi. Zia ziak achun, Lalpa kianga ki tulut ah dawn te’n damna leh hukdamna a changthei uh ahi. Khaile, Lalpa kianglam zuankit in amabep kiang in kumtuang damna a um hi.
Khaile unaute, icha inaute, izi, icha, ipawsal khamthei thil a saltangte hi bawl mailo a damtheina ding un vitamin pha pia hitiu un, heipi tak in duat in Lalpa kianglam puihuai guai tiu. Zia gual machun kochuam puite le la Belam teu gilkial leh damlo taksa anpha piau inla, thagau lam bawngnawi in chawm hitiu in, Pathian hepina zal thagau lam hinna lampi puilut ga sem hitiu. Zia chu Pathian nasep di leh mawpuakna talent di leh Lal lukhuk di le himailo ding ahem Belam pu chun a Belam hawnte chu a chingtup seknau hilo ahem. Pathian in a thilsiamte hi pakhat chale mangthai di a phal puai. Hat in etkawl zolo gual a um maleu Siamtu lama hung pui intin vangam chu gingtu josia ahem lut uchu la vangam lawman ding hinalo ahem. Lalpa’n taksa thaklam hatna hunpia henla la cross giktak puak uh hi Lalpa kiang pui tung ding in Lalpa puizel tahen.
Awle unaute, Pathian ma kipatpi mihiam tehi ama kiang tung kit chiat ding a ei dawi leh phut ahi gualma’n I chianau lam zawt khialte hi hepina diktak tawh Lalpa kianglam a puilut chiat ding in pan lathak hitiu. Lalpa’n, ei panpi ngei di ahi ngala, abang chu hitaleh ichanau addict te hi kiltin kaktin leh lamliam thanghuai tak a mipi mu a vak leh simmaw tak a um sang un mani inlum a duat tak a chin uh chu neksak dawnsak, kap sak maileu hin khawpi thiangtho zaw’n tin eule I lungkhamnau tawmzaw mailo di ahem. Chutileh, ginglote’n Christian gam thianthona hun mun tin un, gamtin a chanchinpha gente gual himailo di ihiu em ka ti vawng vawng sek hi. Zia hi chu mimal hithei hi puantin gingtu josia bawl ding a kilawm leh ahi di dan tak ahi.
Aw Lalpa ka gam ua hin gitlona asang talua ta, bang achun thimlai vaihawmna nuai ka umna ahi, thilbuak khamthei thil leh gitlona asang taluata la thagau in hung hal thiang inla, khawvel mi josia’n la thupi hung muchian henla, pakcha hawitak kilawm tak te hun pak sak inla, mi josia’n la hitheina leh la Pathian hina hung mu chian tau hen, Amen.
