SUNGKIM TUIBANG TIN LAI NGAI A ZUAL VANNUAI A
By- KL Muana Vaiphei
Pathian in hing mi zosia hi inkuan khat in ei siam ahi. Himaleh, suan leh pak I hung nei chiat phat leh a chuam chuam in I hung khawsa, nek leh chak leh thil dangte ngaitua in inkhat chiat in I In- chuan a, zia chu tulai pau in inkuan khat ti in I hung ki he tau ahi.
Pa khat suan khat chiat himaleu hin le zi leh cha chanute, pawsal ngalchang nei in mi phung a chang sek tau. Ahinla, unau- LAIGUI khat hina chu a bei diak puai, ahin tuni hun ah I gen nawp pen chu ahileh zi leh chate nei masang a nu leh pa huang sung ah suapite tawh lungtuak tak ah, lungthim munkhat, nek leh chak kithakhat, sep leh bawl ah le kituak tak, hing leh dam ah um khawp hun lai a nawp dan hi I vel ngaitua chun ngai a um bep hilo a lunglen a um dante I ngaitua chang in hun chiasa ngai in a ki kap ngawi ngawi sek hi.
Inkuan khat lim leh kipak tak ah inkuan sung ah thina ahem I tuak phat tak ahileh ki heneptua hi thil haksatak ahin, damlona neklo chak lo, thina tiang buaina tinglo ahung tunphat leh inkuan in thei tawp in kipanpi sek in I kithamuan tua in a nuam chuam ma ma hi. Ahin thina damsung ah ki mukit talo ding a kinutsiana mi zosia a ding lungdawn um tawp khawk ahung hi ta mai sek a, zia hi mihiam te’n pumpel theilo I hiu ti ei hiat dawh sak a, ngai thiam haksa maleh I bawlthei bang ma um ta lo ahi tak ziak in mittui te bazaal in I thaliam mai ta ahi.
Malai ah inkuan chu ki lungsiatna leh kidawisakna tawh a tawp tiang in I ki- it in, I ki ngaina tun tun hi. Tulai chu a tangpi zia khawvel dan gual mai in ngai ma ma chung ah galna pakkhi, puandum leh ankuang sawk khawm in I ngai takte chu I tha liam ta mai sek ui. I thi nung kum tam hiat phak hilo in thinung ah Vangam ki mu kit di’n I ki tiam ah a liam ta mai sek ahi.
Tuhin chu Khrista ah thawkitna kinemte I hi ziak in van mun lopi ah chia masate tawh kimutua di’n ginna’n I kithamuan tau ahi. Zia zosiate Khrista hinna neite leh neilote kikal hi ka ngaitua chang in lungkhamna’n a kidim sek hi. Kuale, Pathian thupiak huam in a damlai ah Pathian taksang a, ama dawi gual sem a, vankhawpi ah SUNGKIM ah kimu khawm ah van Angel te tawh Belam no ma ah lamkhawm thei di’n I mawpuaknau sem sek hi tiu.
