CHRISTIAN GAM SOUTH DISTRICT (CHURACHANDPUR) THALEK GAM CHANG DI A BANG TAI
By- KL Muana Vaiphei
Hinna Bu I Bible thiangtho a thilsiam zosia chingtup di leh duat ding ah Siamtu’n mihiam te hi ei ngai zing lai in, chingtup leh etkawl (stewardship) na seplam ngaisak talo leh kihetmaw bawl a, sukmangthai, sukbei, suak leh sal ah kawi, luakhum- thuneikhum ahiloleh bawl khum mai gual in ganhing leh lohing muding a vang ma ma tai.
Pathian thilsiam gam hing zu leh sa, thil hingte tawh lim leh kipak tak hinkhua matkhawm hi, mihiamte hinna a sulim in nisin hinkhua mat le a kipak um diak a batna tam tak a um hi. Zia thilsiam te chung ah I gam tat dan uh le ahi hi diam mihiam te lak kihepina leh kipawlpilimna nuam hi le hung tawm hiai hiai ahi ta dia aw ka ti chang a tam ma ma hi.
Chuleh, khawvel boruak huithiang le nisin phial in a lum leh a vawt dan le a hung kidang lam a, mihiam damtheina lam ahin le hiselna sukha ta hial hilo ahem ka ti sek hi. Zia haw chungchang hi miching leh mihiam chungchuang te’n I mihiam chanpi teu hiatthiam ding in zilsakna chi chuam hung nei leu a pha chuam dia aw ka ti vawng vawng hi.
Tu dinmun ahin thingtang lo vat leh hal hung kipan in tin, mual leh tangte hal thak in hung um in tin, zu leh va tam tak te’n hipi- galpi ziak leh haksatna duailo hung tuak ngei diu ahi. Ziate apat chun neukhat bek ki venbitna ding in government leh mimal tin te’n bang gual panpina I sial thei diam uh ti hi ka ngaituana’n a hung lang hi.
Zia a chung ah I gente hi khatvei thu ah san danglam ziang thei chula hi puan tin, zia thil huaisia leh haksatna apat siamphatna (relieve or substitute) ding bawl dan government leh kochuam lam apat lampi sial dan hung um thei le chu thilsiamte le hing dip dep intin, mihiam te’n le I hinkhua chawmcha hi lamsuk lamto tam sek maleh, hun chawmcha bek lim leh kipak tak in I mang thei zaw deu dia aw ka ti sek hi. Zia thilsiamte leh mihiamte hing zing hinkhua hi lim leh kipak deu ah mat ahi theina di’n Pathian in ei tua ta hen, Amen.
