Zalmang mai a la hi…!
-John Suantak
Khawvaiphei Writer
Office ah nasem ka buai laitak in ka PA, nungak Felkim chu kisuangla tak kawm in ka dawkan lam hung zuan in, “Pu, lennaphual ah mi la lamtua ding hun minute 10 in a vat tai aw…” ti’n kichian leh feltak mai in a hung gen siausiau ah. “Oh….ka la hemil tavang, ka nasep ka buai bekset a, lei remind ziak in ka kipak hi. Ka gari tawltu Pu Awnsiak kiang in gari chu mansa um ding in a la hiatsak ngal in aw” ti’n kenle ka dawnhu ngal hi.
Ni 2 chiata masang a khan US President Pu Donald Trump in, telephone mangcha ah ei hopi a, Khawvaiphei khawpi masawn dan leh kivaipuakna kitup dan khawvel thuthang chanchinbu in ka la hia, zia chu entha hung ding ka hi, a hithei diam, ti ah ah dawtna ei bawl chu ka office nasep ka buai bek ziak in ka la hepha ta puai.
Ka office ah nasep ding tamtak umte maleh awl ah sep thei ding umte chu kawikang in, minute khat ziang le pamai ahi ziak in ka official gari Maite khutsuak sung ah tulai khawvel technology tawh kituak ah kisiam, a sung ah office na bang hem zat septheina ding ah kisiam monitor tawh kithua sung ah septhei dingte chu tawh Khawvaiphei lennaphual lam zuan in ka kipan dawk tai.
Malzin nei ding ding ka hiziak in ka thasang ah pang ding ah ka muan Secretary te chun feltak in a tunna ding uh leh a mau thatnawp theina ding leh a munawp u leh hiat belap nuam na mun teu chu guangtup sa a kawisa vek uh chu a hi tai.
Ka gari tawltu Pu Awnsiak in feltak in gari chu mansa diam in a kawi a, keile kintak in Khawvaiphei International lennaphual lam manaw in ka chia hi. Ka office apat lenna phual chu KM 20 vel himaleh lampi ah traffic jam umlo in zangtak in ka chia thei a, minute 15 tinglo in lennaphual chu ka tung ngal hi. Khawvaiphei International Airport ka tun un a mau inle Khawvaiphei Standard Time dungzui in minute khat ziang le hallo in lenna chu a hung chu chet a, damtak in Pu Trump leh a zi ka lamtua thei ngal hi. Kei ka min Khangkhankhual a hia, Khawvaiphei khawpi enkawltu ka hi” ti’n kei leh kei ka ki introduce ngal hi. A ma’n le kipak leh feltak in chibai ei buk ngal hi.
Gamdang leh mundang gual ah security bangma umlo chu lauthawng hileh kilawmtak in Pu Trump chun ei dawng a, Zia gam ah thilsia leh buaina bawl ding kuama umlo a hidan leh, mi zosia a mau nek-hawlna ah buai chiat a hidan uh ka gen leh lungmuangtak in Thuklai chawlbuk lam ka zuan ui.
Khawvaiphei khawpi umdan leh masawn dan te chu hawkdak tithei hial khawp in Pu Trump chun dak gekgawk hial in a en a, dawt nawp a hau mama hi. Kum 50 masang ah America gam mi zosia’n a ettawn uh, tuhi’n ken Khawvaiphei khawpi apat, lampi ka zawt mai inle zil ding tampi ka nei hi ti’n a gen hi.
Thuklai chawlbuk ah chawldam a, zia zaw chuleh a masapen ding ah Sizo Thuak University a vethak a, thugenna khatvei bek nei malam leh ti ka duthusam a hi. Zia chu ka gen piak a, a male a kithalawp mama hi. A diktak ah gen in, Khawvaiphei khawpi masawnna hi Sizo Thuak University a pat ziltilna hawiziak a hi pen a, khawvel gam chuamchuam a pat a zil nuam naupang lak senlo umna, demand san penna mun ah tepte le a hitai.
Kum 50 masang lam et in, Zo suante chu nambing chuam chiat ah kikhen in, mani masialna tawh khat leh khat kinakna leh kituaklona a la um in, sa-leh-gal na tiang ah a kimat lai niute bang ka geldawk hi. A hinlah, tu dinmun in vang, gingtu hina tawh kihiatthiamlona leh mani masialna zosia chu chillum ah val thei a, a hatlote kisawmdawl thei leh thudik ma dinpi a, Pathian nei nam ka hi ti thupi chiapi a hiziak ah khantona um a hi ti muthei in a um hi.
Zingkal nino etlawmtak hungsuak in, Pu Trump inle Sizo Thuak University ah zillai te leh zilsaktute kiang ah thugen ding kithalawp tak in a coat suit nal thei pen tawh a kisabem set hi. Keile intekpa hina tawh, office lam ah suty la hial in, malzin te chu a nawpsak thei ding pen ua bawl ding kati leh ka tup dungzui ah sukbutin ka nuam zing hi.
Zingkal lam, Khawvaiphei Standard Time dak 10:00 chet in Pu Trump tawh Sizo Thuak University ah thugenna nei ding in ka tung tau a, hun piak ah a um hun dak 10:10 chet in Pu Trump in thugenna a nei thei pan ngal hi. “Kum 50 masang lam in khawvel pumpi in America hi ettawn tak a sak leh a ngaisan pen uh a la hizing a, zia chu ka kiletsakpi ua, himaleh tuni tiang in, gam khat nei le hilo, khawpi pakhat mai, Zo suante umna – Khawvaiphei Khawpi khantona leh masawnna, kivaipuakna kitupdan kamu in lamdang kasa hial hi. Zia hi thildang ziak hilo in, Pathian nei nam a hiziak uh a hi ti kichian tak in kamu chian hi. Khawpi neucha himaleh, khawvel pumpi hiat ah tepte kham lawtinna nei a hiziak in, kei leh ka zi inle khatvei tei ka mit ngei ua mu ka nawp ziak in ka hung ua, gam khanto dan mai hilo in, kivaipuakdan kitup dan leh gam mipite’n titakna tawh thudik ah a kipiakzaw nau hi ettawn tak kasa mama hi” ti’n a gen hi.
“Nekguk-chakgukna umlona gam, mipite’n mani sep ding dawl sem a, khawsa-ul pawtlo ah nek hawl kuama umlona, sang ah lian zawte zana mun, midangte panpi nawpna lungthim nei gam chu Pathian in a malsawm lo theilo ahi” ti’n Pu Trump chun a gen hi.
Sizo Thuak University ah kai, zillai naupang singtel ah simte chun le Pu Trump muakna in thingtangpa khutsuak ngei ah siam, Dumbel, Khival leh Dakpi piakna a nei ui.
Pu Trump in a request dungzui in, a hiatnawp zing, Zosuante kichendan, mo man tawh kisai leh siatni-phatni kivaipuakdan haw chu Sizo Thuak University te chun demonstration nei in a etsak ui. “Zia gual ah chawndan kilawmtak nei a, khawvel ah khawpi khangto pen himaleh pu-pa chawndan kembit ka mu masak na pen a hi. Khenkhat te chun a bailam hawl in, awlsam thei pen in bawl maleu, zia Khawvaiphei khawipi ah ki-lunggual tak ah chawndan la kepbit uhi ka hun pakcha mama hi” ti’n zillai khangthak te pakchak thu a gen hi.
