A lettu: Ginlalthuam
Lalgin Inn
Mualngat Innpi
(Khualzinna Gam)
Khawvel ah mihingte adia beidawn, lungkham, mangbat na ni 25th Thakau( March) ni apat India pumpi National Lockdown masapen, Prime Minister, Pu Narendra Modi in declaration ala bawl/ puangdawk ta ahi. Lockdown 1,2,3,4, leh 5 tin ahung chiato peka, zia tawh kizawi ah containment area aum sak kik ngen ua, zia bep chuleh hilo in Covid Isolation ward, Covid care centre, Community care Centre, Home Isolation tite ahung um topek nalai lai ah, chiavel vak velna te a nawngkai/ gakna(Restriction) hung um in, zia te hawh zosia hungpal galkai in kumkhat tavang chuh KIKULKHUP i la mangtau ahi.Tichun, 2020 kum chuh haksa tak in ila thaliam ham ham tau ahi.
A hileh, kumthak 2021 ihung galkai kik tau in, vangsiat ziakin i mihing chanpi tamtak ten thaanmual ei la liamsan nungun, hing leh dam ah umna lai ten Pathian mapuina zalin kumthak galkai thei ah ium ziak un, Lalpa Pathian i chawihawi ahi.
Corona Virus apat idamna ding un kikapna (vaccine) India ten ila ngak zing uh chuh vangphat um takin,Bharat Biotech te siam COVAXIN leh SIRUM institute of India SII Pune leh Oxford University kithua in COVISHIELD teni hih Drug controler of India in kap theina ding phalna ahun petau ahi.
Govt. in Covishield damdawi hih kap masat dingin agen un ni 7 apat ni 10 sung in muthei dinga ginchak ahi. Achutileh, tu Dipi(Jan) thasung ahin kap pat thei hung hitanna, ei uh India gam sungah mihing um hih 138 maktaduai(Crores Population) vel ahin, govt. guanggal danin 30 Maktaduai(Crores) vel hih damdawi kap masak dingah guan ahi. Zia 30 Maktaduai(Crores) te lak ahin 1 Maktaduai(Crore) te chuh Thiampu(Doctor) te leh damlo kaituatute(Nurse health worker) te hintin uh zia ban ah 2 Maktaduai(Crores) te chuh mabul ah ding(Fronline worker) tichuh Police leh Army te hintin uh, aban in 27 Maktaduai(Crores) te chuh mikua hitaleh kum 50 chunglam te leh (covid virus) natna veibailam thei diak dingte adia guan masak guang gal dan chuh ahi.
Govt. thil guan dan hih zia achung ah te sia hih a thawn ah kap ding( Free vaccination) hiding ahi.
Chun a state a state ahung kihawm ding first stage ah ei Manipur ah mi 49 kap masak ding akitin,zia damdawi kikapna(vaccine) hih khatvei kikap zole a niveina chuh ni 28 zoleh kap kik dingdan ahi. Chun zia damdawi hih fridge ah c2 to c8 dap ah kawizing ding dan ahi.
Khawvel ah gam zosian damdawi(vaccine) asiam thei puan maleh ei India Scientists ten mat thei dingah COVISHIELD leh COVAXIN a hung siam dawk uhi vangphat um tak ahi.
Gam khangtou pen ah igen uh US ten PFIZER leh MODERNA a siam dawk un,damdawi siamdawk dingah kigente chuh Russia, Israel leh Chinate bep cha ahiu.
Covid Virus vaccine kapding chungchang kihiat dan in tu a ni 10 sungin thil bang kim hun sufel zung zung tading in, vaccine receiving centre 4 tichuh Chennai, Mumbai, Kerala leh Kolkata te ah vaccine hung kikawi intin 29,000 (sangsawmni leh pakua)val cold storage centres hun hawng intin uh, ziachuh state zosian adawidan bang chiat ua a kilak theina ding un.Zia vaccine kikap ding zosia hih registration bawl hiding ahi.
😭😷😷😭😭😭😷😷😭
2020 kum huitung kei in zilmun(school,college) kikhak in chapang zosia KIKULKHUP chuleh nasep thilbawl office kai, dawibang tak ah umtheilo in, thilsiamna (factory) mun zosia khak leh kivei na mun zosia chia thatheilo maleh tun, awl awlin kum hungthak kinepna gual tak ah a hung puak lut ding hih mihingte kinepna lianpi hih tangsap thei tak tak chuh ahung hina diam ? I khualzinnau khawvel hih bang ahung suak ta diam ? Ziakachun, la Pathian muok/ tuok dingin la kisazo tam?
